i10 ERA vrs Roadroller
Nikum December thla chawhnu lam khan neih zawng zawng bakah tlem belhin car lei ve teh ang. Mamawhna a sang si a, kan tia. Motor hrang hrang kan en kual ve nasa mai a. Ke li nei la nei ngai ve lo ta chu hmuh hnu hnun apiang kha a tha em em vek mai a. A nun hluah theih a, a tlan daih theih kha chuan ka hmu ṭha fu zel mai. Chawlhkar khat chuang zet ka thianpa Valtea'n min enkual pui hnuah chuan i10era lak tur kan hmu fuh hlauh mai. Kei car la nei ngai lo chuan hrethiam ve hek lo le.. Ka thianpa ṭha tih ber mai i10era chu ka han en leh ta a.
Ka thianpa chuan, 'ka khalh chhin anga lo chuang ve rawh" atih rual chuan phur zet maiin ka chuang lut nghal a. A khalh chhin vel a, ngawi rengin ka chuang ve zel a. Atawpah chuan, " Hei hi a tha, lei ang" a ti hlauh mai. Tichuan a man kan in hlan fel hnuah chuan phur takin kan inkhalh haw ve ta vu vu mai. Ka khalh thiam loh avangin ka ṭhianpa chu hun engemaw chen ka driver ang deuhin a function phawt a... Motor han neih takah chuan chhuah vah ṭulna pawimawh em em mai ang chi kha alo tam ta sawt emawni ka thianpa chu ka ko deuh reng mai. Inthlarunawm duh khawp mai. Amah lah chuan. Hyundai kutchhuak hi a smooth si, khalh a nuam riau mai,wagon R ka hralh dawn a ti ve sek bawk a.
Hyundai a smooth lo!
Zankhat chu Bike ka khalh ṭhin avangin leh ka ṭhianpa khalh dan kalo hmuh tawh ṭhin avangin zuam deuh mai hian keimah a inkhalh chhuah ve ka tum a. Driver seat a ka han ṭhu chiah chu, tleirawl ngaihzawng nei hlim ang deuh ka ni. Ka khur ru dar dar mai. A chabi pawh khur ru dar dar chungin ka vuah a. A break leh a clutch ka hria a... Ka rah tlum tlat ve ve chuan a tlan dawn lo tih ka chiang. Ka herh nung ve ta hluah mai.. Nuam ti deuh si khan ka hlau ru deuh bawk a. Hmanlai pasaltha thlah kal zel chu ni ila, ka herh nun rual khan Hla do ka chham ngei ngei ang.
Gear number 1 ah ka han dah a.. Clutch ka thlah a, nula kezungpui lian an sawi ang deuhin a che ta tual tual mai.. Accelerator ka han rap a le... Rin aiin tha hrui alo nei reuh a, hmanhmawh hmel zetin ka tlan chhuak puat mai. A tlanchakna ka rap, ka thlah leh, ka zu rap leh thin.. Kha tih hunlaia ka intehkhin deuh ber chu, Sunday zing a Kohhran upa, ngaihngam deuh a pulpit sir a muthlu, dak deuh awrh awrh ṭhin hi ka ang deuh ber awm e. Engtin tin emaw ka inkhalh haw a, hmanhmawh deuhin ka ṭhianpa ka zu phone, " Maruti ka duh, Hyundai chu a smooth lo, ka dak awrh awrh a nia, nge a khawl lam hi a fuh zan lo a ni lo maw? Ka zu ti. Ani chuan," naktuk zingah kan en dun dawn nia "alo tia. Lawm lutuk lo, rilru nuam lo deuhin ka mu ve ta phawt a.. Mut hmunah chuan rizai hnuaiah a gear ka thlak chhin, a break ka rap leh.. A clutch ka rap a, ka thlah leh a, steering ka herh, mut hmunah chuan a smooth viau! A takah a smooth si lo. Mak deuh a ni. Khum a practice ringawt chuan thiam a har si!
Atuk zingah chuan ka ṭhianpa nen chuan kan han ti nung a, a han khalh chhin a, khum a ka tih chhin ang chiah tho khan ati! Dak awrh awrh lovin kan chhuak leh lawi si... Mak deuh a ni. Patlingin theih patawp a, zan mutna thlenga han khalh chhunzawm zel takah chuan ka ti thei ve ta fu mai! Hyundai kutchhuak hi motor zawng zawng a, smooth ber alo ni zawk si... Accelerator rah dan a zir zawk alo ni! Tunah chuan gear thlak tur a ka zu ban de de te hian a inthlak ringawt zel te hian ka hria... Ka sawi thiam dan ber chuan... Ka ṭhu chiah hi a kal ringawt zel a ni ber e.
Krismas hmangin Pangzawlah ka hawn a, Pangzawlah ni 3 vel chauh kan la cham hman. Sialsirah kal a ngai ta tlat mai. Kan khaw mite leh ṭhiante pawhin ka motor min hmuh kim sak hmain ka farnute Sialsir lamah ka han thlah a ngai ta tlat mai! Ka nupui ai pawh a ka chul ngun leh duat zawk deuh mah, ka car chu ka ui ru fu mai..Kawng a chhia tih ka hre ve vek. Tichuan ui takin kan han tlan thleng ve hram a. Min khalh chhawk zeuh zeuh tur, Sumo driver senior ka hruai bawk. Khaw kar kawng a ka chhuk tir a hlauh vang emaw ni dawn ni... Hyundai kutchhuak ho chu a smooth bakah a chak mang e... Ritz car a number 2 ka lakna angah number 3 leh 4 hlir ka hmang nia... Ati ve deuh sek a.. Thianpa Dara nupui nei ang deuh ka ni, Ka ti fuh ka inti tawlh tawlh..! Sialsirah zochhang ban kan ei puar hnuin Pangzawl lam panin kan haw ta. Keiman khalh ka chuh deuh tlat... Kal lamah khan min fak sak deuh sek sia.. Ka khalh chak a ni. Zep lovah chuan.. Ka khalh ve ta, tluang deuhin kan tlan zel. Motor dang min tawk zawng a rawn tlante pawh melh tha duh bik vak lovin ka pel thla ve zel. Keitum thlen hma deuh kawng zau lai, kawng sirah Road roller alo ding eng tuk mai, hmuh hmaih chi zia zang a ni lo. Kawng zawl lai a ni bawk a.. Khiiiita tangin ka hmu daih tawh.. Vai pakhat driver seat ah alo ṭhu. Seat khat chauh a awm avangin a ṭhianpa khan seat a chang lova, a pangah alo bei a! Muang zetin anlo che tual tual. Ka tlan hnai zel, an tlan muang pawh a ni lo. An chet muan em avangin nuih deuh tet tet chungin ka pan zel a, kawngsir a awm anih avangin a hranpa a tlan pelh tum hran pawh a ngai lo. Ngil takin tlan ila ka pel mai dawn a ni. Motor khalhte zawng ka thiam ve em! Ka tlan pel tan ta. Anmahni hel ve deuh hlek hi a mawi e.. Ka tia, ka dinglamah tlem ka cut a... Kha kha nimai lawm.. Ka ti rilru a veilamah ka cut lut leh a.. Ekhai! A ri bur mai..A saisir zawngin kan tawlh a, ka tum reng vang pawh a ni lovang.. Kan din dan kha! Kan ding chiang em leh lutuk mai. Car a thi hmak a.. Ka hlau hle tih ka hriat kha chuan kan ding fel vek tawh a, a chhe tur lai chu alo chhe fel vek tawh nia! Kawngkhar ka hawng a, ka chhuak, ka sir a thu sumo driver pawh rawn chhuah ve a tum a, a kawngkhar a hawng lawk thei lova, ka va pawh pui a, a rawn chhuak ve..
Kawngsir a Road roller ding mai mai tai ka nih avangin ka thiam lo chhia va tih a chiang. Thiamthu sawi tur a awm lo. Driver side lam chu a him, ka en kual zel a... Awiiii.. Ka side lo lam chuh... A hma kawngkhar leh a hnung kawngkhar chuh.. Awi awi awi.. A changtupa leh misualpa motor a an in um a, duh tawk a an innek velna a ang ber e.. Thler phei vung mai. Engtin nge nita ang? Siamna tur pawisa pawh ka nei hleinem.. Tu pawisa nge ka puk ang? Siam man a to dawn si! Motor part te chu wai wai leh RumPum man aiin a to fe si a. Ka ngawi vang vang a, ka motor bulah ka ding reng a. Tihdan ka ngaihtuah! Vaipa bulah han kal ila vai ṭawng ka thiam si lo. "Intlan chak lutuk anih kha" ti dâwn ila an che tual tual chauh a ni si. In rawn kawi thut a.. Han ti dawn ila, Road roller te chu steering herh ngat ngai ania... Ka car changkang chi anga power a ni ve bawk si lo... A kawi thut dawn lo chiang... Vaipa chu han be phawt ang ti rilru chungin ka han pan.. Mera car kharab! Ka han tia... Ha... An lo ti. Sawi leh tur ka hre mai lo.. Mizo tawng he? Ka ti leh.. Telem telem.. An lo ti hlauh.. Keichuan ka thiam thu sawi ta lo chuan ka neih chhun a ka lei anihna te, siamna tur ka neih loh ziate ka sawi a.. Min khawngaih ve hmel khawp mai. Anni lah chu an chheve der si lo. An Road roller ke kilhna lianpui a NUT ah hian ka car rawng a kai hlek a, chu zawng chu nimai a.. Tichuan le, inbiakthui vak ngaihna awm hek lo. An office awmna ka han zawt a, thlang lam,kan la tlanna tur lam an kawk a, kan inzui thla ta.. Hemi ṭum a ka ui zia ka lantir vel lai hian ka driver hruai Zela khan ṭap ang ten minlo sawi mai mai.. Ka ṭap lo ... Tichuan an Office chu Road roller rual chuan kan pan ta. Kan thleng har khawp mai a.. Mahse a hla lo.. A muang em a ni. Chuti khawp a muang chu ka su chu aniah.. Pangzawl a ka thianten min khawngaih viau ang. Mahse min khawngaihna aiin an nuihzatna a thawk na zawk dawn tih pawh ka chiang! Ka va haw peih lo tak! Dumka camp a awm reng ringawt thu awm si lo.
An camp ah chuan midum kawng siam anlo ther fur a.. Min tawrhpui hmelpu an awm lo kha a mâk lo. Kan inchhung hnai vai lo hlawm bawk em a ni. Ka driver erawh tlemin a vun rawng a tak zawk a, a tla tlum hret zawkin ka hria!
An pu ber hnenah min hruai lut a, sap tawng alo thiam hlauh a, insawi thiam miah lovin ka dik lohna ka sawi char char a, kan harsat thu leh siamna kan neih loh thu ka sawi ta char char a. Min en reng a, mangan tawpah chuan Sapṭawng pawh kalo thiam fu mai. Ka sawi a hrethiam ve vek a niang chu... A ngawi vung vung a " Aizawl i let leh hunah kan Company manager Huntharah a awm a, lo bia la, i siam man tum vek turin kalo hrilh ang" ati ta mai. Ka va lawm tak..Ka hawi let vut a, ka car ka en a,ka rilru chuan... Aw, min siamsak tho dawn te chuan a leh lam zawk pawh hi kalo tichhe tel law law lo a ni" ka ti rilru hman. Het! Phakarna rilru hi ka inhmeh lo.. Ka rilru ka thlak lehnghal vat. Awle "tiin phone number te kan inpe a, kan invai liam ta a. A chhe tur lai a chhiat vek hnuah ka han khalh ngam lo leh hnuhnawh a. Driver bulah ka thu a, Pangzawl kan panna kawngtluanin ka inngaihtuah a. Polite tak leh tawngkam mawi lo hmang miah lova ka dawr vang khan min khawngaih a min siamsak mai mai a ni tih ka hrechhuak a...Min siamsak tur thu an sawi avangin ka hlim ru fu! Lehlamah Pangzawl thlen huna sawi dan tur te, min nuihzat dan tur te, min khawngaih dan tur te ka ngaihtuah a. Ka huphurh ngang mai.
Pangzawl kan thleng ta. Khua kan lut chiah a, kawngsir a naupang ho ball petin kawng min ken pah a, "Ehe" an tih ri ka hria.. An mawl tak tak a ni.. Kan veng kan thleng chu le... An en nghal huai huai.. A chhiat hmaa min ensak pawh tum lo ho an rawn lang tuam tuam a.. Min khawngaih thu an sawi pahin a tawpah an nui zel bawk a. Ṭhe ṭhaw hlawm a... Min ngamtlak zual an rawn kal a.. " Road roller kha ava rawn bei chak awm ve" te an rawn ti.! Hmm..hetia titu hi a tam zawk an ni.
Ni 3 hnu velah phei chuan..tinge? An tih apiangin rang deuhin.. Road roller kha speed a säng em a ni... Kalo ti ve nghal zel a.. An awih chiah lo na a, a tam zawkin an hriat danah chuan Road roller speed san vang kha a ni tlat tawh a... Pawi lo..Road roller kha tlan chak em anih kha! A then lahin " Ti khan a mawi zawk" te zu han ti duh a.. An mak ania!
A thui lutuk dawn e, ka kai tawi tawh mai teh ang. A chhiartu thenkhat pawh hian min khawngaih tak tak lo.. Min nuih mai mai.
Aizawlah zak rilru deuh takin ka inkhalh lut beuh beuh a.. A kawngkhar a thler duai bawk nen.. Chapo ava har tak..
CK Hyundai ah ka tlang nghal. Thuampuiah khan... Minlo dawng sawng tute an fel ngang mai. Millennium sub-center... a ni ziah lo. Millennium Center a dawr nghaktute ang an ni ve lo... Phone khawih pah ve miah lovin, min en a, kan duh min zawt nghal... Ka intih palh dan zawng zawng ka hrilh nghal zung zung a, minlo dawngsawng tupa kha, cher lek lek, kuva heh hmel zet mai hi ania.. Min tlawm deuh theih te, min khawihsak hmasak theihte ka beisei deuh bawk a... Kuva i duh em? Ka tia... Alo ei ngai lo hlauh.. Chaw chauh ei chi alo nia! Zuk leh hmuam a fihlim chu ruihtheih thildang ah a fihlim ang tih ka chiang.
A siamna man Company in min tumsak tur thu ka sawi laiin chupa bawk chuan ka ṭawng lai minlo pawtchat a, "Accident na a chhe lai bak siam tum suh aw... A tluang lo ania" alo ti var a.. Umm, hepa hi mi dik a ni tih ka hre nghal.. A thawk ve midang pawh hetiang an nih vek ka ring nghal a.. Amah avangin ka phakar ngam lo leh ta... Kan insutna hmunah khan ka phakar ngam lo tawh bawk a.. Phakar loh vawi hnihna! Khapa kha, han en mai chuan mikhual ni ta se, khualbuk pawh chang bik lo tur, mite hnawl liam mai mai tur, hnung lam atanga en chuan a kûn dê a, hma lam atanga en erawh chuan a eu êr bawk si! Mahse ka ngaisang tlat khapa kha..
"Motor hi hawn leh la, i hun a thlen hunah kalo phone che anga, kan siam ang" tih pahin receipt emaw ni, siamna tur atana book na emaw lehkha hi min pe pah a..
Siam hunah minlo phone, kha mihring bawk kha a ni. Duhsak bik neilo tupa kha! Phur takin ka va i dah phei leh.. An khawih nghal mawlh mawlh a, kawngkhar hnung lam min thlaksak a, a hmalam an pawt mar ( denting an tiin ka hria) bawk a... Rawng an kap bawk a... Ka thiante chuan ka sen tam an rin nen, ka rin aiin ka seng tlem, ti ila... Ka rin aiin vai Company khan an seng tlem a ni zawk mah..
Ṭhiante lah chuan hmel hriat tha ka neiah min ngai vek.. Mahse hmelhriat tha ka nei lo. Car Company ṭha ka lei a, Servicing nei ṭha ka nei a ni zawk tih hrilhfiah ka ngai lo. Hyundai kutchhuak kher kher kalo lei hi chu ka nupui tih lovah chuan ka neih fuh ber thil a ni. Inchungah khan nula fel tak tak an lo ṭhu a, tah chuan bill ka han pe ta in ka hria.. Pawisa nawi min kir tur an nei lova, chewing gum min pek an tum a.. Kuva min theh zawk ru.. Ka tia.. Min beisei hmel deuhin kuva min theh kha.. Mahse pawi lutuk, nupui ka nei tawh.. Coffee pawh a kawtzawl ah khan ding chungin min in tir bawk. Ck Hyundai a thawkte hian inthurualin Zarda dawr siam se an hlawk ngawt ang. An fel em mai... Mahse Zarda dawr leh car Servicing chu a sum che vel a intam hleih deuh mai thei. Zarda dawr kha chu lo ngaihtuah chhunzawm lo mai zawk teh u. Car Servicing tir atan in ṭha rih aw...
Car hmelhem miah lo Office ah ka han keng leh thei chu e, nuam tak a ni.. A chhiat lai kha chuan tleirawl ngaihzawng ṭhen ang deuh khan ka awm a, khawvel hi a êng(yellow) pup hian ka hria a.. Tunah chuan ruahsurin khawvel a tlêng fai sar ang deuh hian ka hmu thar lam leh ta. Khawvel hi alo va nuam tak! Tunah chuan ka car chhiat laia min nuihtute kha ka tlan khuk zarah anlo hritlang ve leh thei ta...Ava lawmawm em... Het! Ka rilru hi a ṭha ngawt mai.. Tuihawk kala dai per miah lo ania! Tun thla June, Lockdown lai te hian ṭhiante ka ko a, an hman lo chung chungte ka khalh chhin tir lui vel a... Uluk taka enkawltu min hmuh kan daih a, i10 te, i20 te chu a tha em alawm..a smooth em alawm.. An ti ziah leh nghal... A dik! Mahse, hei hi lo hria se ka ti. Ka uluk vang pawh hi a ni ve tho bawk aw.
Hmanniah Tuivamit ah kan inchungpa nen kan zu leng a, chhuah pahin door lock ka hmet a, chabi phawi si lovin ka khar hmiah.. Kan haw tur kan lut leh dawn a, kan hawng thei ta lo, You Tube nen tang kawp in hawn kan tum ngial, taxi driver kan ti ding, chu pawh a hlawhchham! Tuikual ah spare key kan chah vang vang... Mite chu chhunglamah an tâng a, keini chu pawn lamah! Mahse ka lawm tho. Door lock hi chuti mai mai a hawlh hawn theih a ni ve lo tlats!
Mahse, car ka lei leh hunah chuan..... Hyundai kutchhuak bawk ka lei leh ang... Em em ana!
(He article hi CK Hyundai in Lockdown chhunga Hyundai Car neite tan, an car leh a hun an lo hman tawh dan inziah siakah lawmman 2 na ka dawn pui ve tlat mai. Ka lawm hle a ni.)
